O Ministerio de Industria, Comercio e Turismo anunciou que Industrias Guerra é unha das empresas que se beneficiarán do Proxecto Estratéxico para a Recuperación e Transformación Económica (PERTE), co que se busca revitalizar e modernizar a industria naval española.
Grazas ás adxudicacións desta iniciativa, 14 proxectos de 8 empresas do sector naval da provincia de Pontevedra recibirán subvencións por un total de 4,05 millóns de euros, destinadas a impulsar a competitividade e o crecemento sostible desta industria. Os dous grandes proxectos tractores serán os impulsados por Navantia-Pymar, dirixidos ao ecosistema estaleiro, e por Tecnaval, destinados a toda a cadea produtiva co liderado do Centro Tecnolóxico dos Estaleiros Medios e Pequenos (Soermar).
Neste último proxecto atópase Industrias Guerra, que recibirá unha cantidade económica de 469.995 euros. Esta subvención promoverá a implantación de novas tecnoloxías nas súas operacións, o fortalecemento da súa competitividade e a creación de emprego. Víctor Pintos, director xeral da empresa, declarou que “os fondos do PERTE Naval bríndannos a oportunidade non só de mellorar as nosas operacións, senón tamén de xerar un impacto positivo na nosa área de alcance. Estamos comprometidos a utilizar estes recursos de maneira eficiente e estratéxica para seguir medrando e fortalecendo o noso papel no mercado naval”.
As principais receptoras das axudas na provincia serán Nodosa e Willbö, con máis de 2,6 millóns de euros, ás que se unen Astilleros Ría de Vigo, Revertia, AIRE-VR Meifus, Freire e San Enrique, que recibirán o montante destinado a Pontevedra.
O PERTE Naval busca xerar máis de 3.000 empregos en toda España
O subdelegado do Goberno en Pontevedra, Abel Losada, manifestou que “o obxectivo do PERTE tamén é mellorar as condicións laborais deste sector clave na provincia. É esencial para avanzar en calidade, capacitación e dixitalización para lograr unha maior modernización na construción de barcos”, engadiu Losada.
En total, o PERTE Naval asignou 81 millóns de euros a máis de 107 empresas españolas, entre as que se atopa Industrias Guerra, cos que se pretende aumentar a súa competitividade nun 15%, así como lograr un crecemento anual do 9%.
Esperase que estes investimentos xeren ao redor de 3.100 empregos de calidade, especialmente en rexións periféricas, contribuíndo así a abordar o desafío demográfico que enfronta o país.
